Es lysligs Lied

Darf i euch bitte für ne churze Momänt
Ds Rede la z'sy wenn o Flüschtere längt
Nume z'schmunzle wenn dir ds Gröhle chöit bha
Und ds Klappere mit em Gschir z'underlah

I bitten euch drum wüll's so sällte passiert
Dass niemer d'Stilli mit Lärm malträtiert
Wäm ligt hüttzutags no öppis ar Rue
Däm wo am lütischte schreit lost me zue

Und so wärde vil luti Versprächige gmacht
Di meischte dervo nid mid Vorsicht bedacht
Es dünkt mi fasch je lüter eine öppis verspricht
Desto wahrschinlecher isch's das är's bricht

Und drum singen ig euch es lysligs Lied
Wo ne bescheidene Tonfall vorzieht
Eis ohni Versterker und Mikrophon
Mit chlinen Ambitione und keim grosse Ton

Und i weiss scho es wird keis gwaltigs Echo druf gä
Für das müesst men äbe e Lutsprächer nä
Aber ehrlech gseit isch es mir lieber e so
Denn die wo's wei ghöre verschtö mi gloub scho

Und drum singen ig euch es lysligs Lied
Wo ne bescheidene Tonfall vorzieht
Eis ohni Versterker und Mikrophon
Mit chlinen Ambitione und keim grosse Ton

Und drum singen ig euch es lysligs Lied
Denn vo däm lääre Gschrei bin i langsam e chli müed
Und o wenn me sich dr Inhalt cha schänke
Und's nid so rein tönt wies sött sy
So schänken i doch wenigschtens reine Wy y
Ja so schänken i doch wenigschtens reine Wy y

 

Ufgno, gmixt und gmasteret vom Alain Andrey, freeze studio, Biel
Alli Live-Ufnahme stammen us em Café Alpin in Bern
Songs 1 und 2 vom 23.11.2006, Songs 3, 4 und 6 vom 19.10.2005,
alli andere Songs vom 15.11.2006
Text und Musig bi allne Lieder: Nils Althaus
Gitarre, Gsang, Cello, Perkussion und Gschnurr: Nils Althaus