Zum Glück frohlockt dr Herr Gnägi hei mir üs verfahre
Ds ächten Italie findsch halt nur näbenuss
Es Lächlen und es buongiorno scho ghörsch zur Familie
Und die Pizza Quattro Stazgioni e Musekuss
Und wien är so dr letscht Biss abeschlückt
Da dänkt sich dr Herr Gnägi ganz entzückt
S’isch eifach scho nes anders Land
So lebändig und offen und d’Lüt so entwaffnend diräkt
Es total anders Land
Tupfgenau so wird’s beschriben im Ferieproschpäkt
Und dr Padrone stellt ne uf ächt Italiänisch
Jedes einzelne vo sine 18 Änkelchind vor
Für zwöi dervo isch das Alass für heftigi Schreichrämpf
Doch dr Herr Gnägi dä seit sich das nimmsch mit Humor
Was kümmret mi das Gschrei vo dene zwöi
Mit de 16 andre uf mine Chnöi
S’isch halt scho chly nes andres Land
E chly überträit aber luschtig we mes vertreit
E chly nes anders Land
Wo men offebar under „schnäll hebe“ nid ds glyche versteit
Und är bletteret itz scho liecht greizt i sim Sprachfüerer ume
Mit weler Betonig men ächt am Pepino befillt
Dass me mit emne wireless-fähige Nokia
Und em ne latte machiato nid Titanic spillt
Doch Pepino gspürt scho sälber ds Stimmigsloch
Und leit d’Titanic uf Gnägis Hose troch
S’isch allerdings es anders Land
Aber die Art vo anders die wird im Proschpäkt ignoriert
Das wär hie ganz es anders Land
We chly meh würdi gschaffet und weniger Ching produziert
Doch bevor dr Herr Gnägi zu Wort chunnt het är uf de Hose
Scho die wichtigschte Spezialitäte vom Land präsentiert
Und si Frou rüeft begeischteret lug itz das wäri doch ändlech
E Sprachfüerer wo eim die Chuchi mal gschyd illustriert
Doch dr Gnägi schetzt das alls chly anders y
Und teilt mit allne Gescht sy Theorie
Zum Glück won ig im ne andre Land
Da herrscht Ornig und Zucht und dasch nume dr chlynscht Ungerschied
Und s’isch scho allerhand
Dass mir öich bi üs no hei ufgno als EU-Mitglied
Und mit dene Wort packt är d’Frou a dr Hand und laht nume
No d’Änkelchindwulche zrügg won är ufgwirblet hett
Näbscht dr verdutzte famiglia wo reumüetig feststellt
Dass men ihm alli Wünsch hätt erfüllt wenn är nume hätt gredt
Doch öppis lüchtet ou im hindedry
Am Padrone nid so richtig y
Das isch doch gar kes anders Land
Doch für ungneigti Bsuecher sy d’Ungerschied wahrschinlech chlyn
Wüll im ne andre Land
Da wär’s anders aber das hie isch ds Tessin
Text und Musik: Nils Althaus
© by Nils Althaus