I sta i dr Schlange vor dr Kasse mit em Ychoufswägeli
Da gafft mir so ne angre i mis Wägeli ganz unverläge dry
I hätt ja nüt dergäge wenn är mal e churze Blick riskiere würd
Doch das macht mi verläge s’weiss doch jede dass so z’stiere sich nid ghört
Da fallt mir plötzlech uf dass si Blick uf öppis ganz Bestimmtem rueht
Mir stockt uf ds Mal dr Schnuf mi Härzschlag streikt und i de Vene grinnt
mer ds Bluet
Denn i mim Ychoufswage gschickt verborge zwüsch de Joghurt und em Bier
Ligt ds babyskin vier-Lage-dicke äxtraweiche Toilettepapier
Dä meint itz wohl i lyde an ere Schliessmuskelzällanomalie
I heig Hämorrhoide oder sig haut schüsch scho geng es Weichei gsy
Drum deck i mit Salat das Stück wo useglüsslet schleunigscht wider zue
Doch entblösst die Tat füf Dose Thunfisch und das roubt mir wider d’Rueh
Da dänkt itz sicher jede typisch Ma dä läbt nur vo so Dosefrass
Derby i chönnt’s belege macht mir ds Wärkle i dr Chuchi hölle Spass
I stelle mi beschämt vor mini Thunfischdose und enthülle so
Im glychlige Momänt e Fläsche Schnaps «Aha und suufe tuet er o»
I fa jitz afa schichte rume ds Ychoufswägeli vollständig um
Doch es git hie nümme z’richte alls rundum gafft vo Bestürzig starr und
stumm
Und won i nach em Zale ds Gschäft i deliriösem Zuestand ha verla
Hett sich jede es Bild usgmale was für trischti Läbesumständ ig mues ha
Egal wie schief mi Lag egal wie sehr ä Situation mi Seel ufwüelt
So nackt wie a däm Tag han i mi weissgott miner Läbzyt no nie gfüelt
I tue nid ohni Zwang was i ykouft ha ar breite Masse kund
Text und Musik: Nils Althaus
© by Nils Althaus