Wivil Stärne het ächt dr Stärne won ig drinne sitze
Und heisst e Stärne wo nur ei Stärn hett ächt eifach nur no Stärn
So warten ig chly uf d’Bedienig und wytri Geischtesblitze
Da chunnt erschteri und fragt mi fründlech «was hättet dir gärn?»
S’isch luschtig dass dir fraget wüll i ha scho mängisch dänkt
Ref: I hätt gärn anstatt zwöi Täg Wuchenänd vo jitz a lieber drei
Und wenn’s geit derfür de immer a de angre vier Täg frei
Und denn no ds Ei vom Kolumbus aber nur ds gälben innedrin
Und süsch chunnt mir spontan jitz grad nüt i Sinn
Doch ar Chällnerin schynt itz plötzlech d’Antwort nümm so wichtig
Churz abunde informiert sie sie heig nume Öpfelpunsch
Und e Stammgascht schnoubet nume liecht verächtlech i mi Richtig
Strycht dr Bierschuum us sym Schnouz und meint «Süsch no grad e Wunsch?»
Danke würklech nätt vo öich doch süsch bruch i grad nüt abgseh vo
Ref: Anstatt zwöi Täg Wuchenänd…
…Und süsch chunnt mir spontan kei andre Wunsch i Sinn
Doch o dasmal schynt mi Antwort irgendwie nid würklech z’gfalle
Denn dr Chef dä wirft mi us dr Beiz und chopfvora i Pflotsch
Und won ig gäge d’Schue vonre Gang vo Gängschterräpper pralle
Rysst mi dr Gröscht vo dene haarscharf vor sis Gsicht und schreit «was wottsch?»
Hm dass euch das interessiert ja aber i verzell nech’s gärn ig wott
Ref: Anstatt de zwöi Täg Wuchenänd…
…Und süsch chunnt mir jitz gwüss grad würklech nüt i Sinn
Won ig im Chrankebett ufwache fö Gedanke mi a plage
Und i murmle so zu mir dass söll itz eine mal versta
Da gisch de Lüt geduldig Uskunft uf alli iri Frage
Und zum Dank bechunnsch e Chiferbruch wie söll das wyterga?
Wies wytergeit Herr Althaus ja das isch gloub zimlech klar und zwar mit
Ref: Täglech ou am Wuchenänd nur Vollchornhaferbrei
Und da git’s weder am Geburtstag no a angre Fyrtäg frei
Ds blauen Oug macht üs kei Sorge aber ds Gälben innedrin
Und dr Ganzkörpergips isch bestimmt i euem Sinn
Zerbrächet euch nid z’fescht dr Chopf seit dr Dokter no ir Türe
Us Erfahrig würd i bhoupte d’Lüt wei d’Wahrheit nid mal gschänkt
Doch mal so ganz under üs syt dir villecht nöime düre
O chly sälber tschuld was heit dir öich derby de nume dänkt?
Jitz han i’s doch scho drümal gseit lost mir hie kene zue i ha dänkt
Ref: Anstatt zwöi Täg Wuchenänd hätt i gärn lieber drei
Und isch das so schwär z’versta mit dene angre vier Täg frei
Und vom Ei vom Kolumbus möcht i ds gälben innedrin
Und wenn euch das nid längt chunnt mir no anders Züg i Sinn
I hätt zum Bispiel nüt dergäge wenn mi Pöschteler jitz fingt
Dass är ab sofort anstatt Rächnige geng Spiegeleier bringt
Und es wär mir ou nid unagnähm wenn alls druf würd besta
Dass‘ für mi i jedem Migros müesst en Äxtra-Kasse ha
I chume z’schlag wenn uf ds Mal ds Stüramt geng zu mine Gunschte bschysst
Und mi Meersou plötzlech d’Wonig putzt und Golddukate schysst
I nämt o ds Füfi und ds Weggli und d’Beckerin derzue
Numen öppis bruch i nümm vo blöde Frage han i gnue
Text und Musik: Nils Althaus
© by Nils Althaus