I ha minere Liebschte nachdäm si ja hett gseit | Ä Ring gkouft dass si dä de
a üsre Hochzyt treit | Und ha mir dänkt so ohni öppis drum wirkt’s e chli
stier | Da wikl i doch mis Gschänk no i nes prächtigs Gschänkpapier
I ha ne Bitz zrächtgschnitte und’s usbreitet uf em Tisch | Ds Truckli
obedrufgstellt wo dr Ring drininnen isch | Ha nes Bändeli usgwählt wo
farblech passt derzue | Und es Chläbistück abgrisse für’s uf ds
Gschänkpapier drufztue
Doch won i das Chläbi vo syr Rolle ha befreit | Hett im nen Ougeblick vo
liechter Unufmerksamkeit | Ds einte Chläbiändi ds andere berüert | S’hett
sich verzworglet was schlussändlech zur Unbruchbarkeit hett gfüert
I ha mir gseit bevor du mit däm Chläbi alls verheisch | Isch’s gschider wenn
es nöis nimmsch und das Gschwür i Ghüder gheisch | Doch wüll di chläbrig
Site jitze hett gäg use zeigt | Han i umezuckt und gschüttlet s’hett mim
Wille sich nid beugt
D’Vernunft hett mir du nüchtern gseit: jitz los mir zue du weisch | Wenn du
es zwöits Stück Chläbi uf das erschte Stück druf leisch | De wär’s
neutralisiert dir gloubet’s nid i has vercheibt | Has uf di falschi Syte
drückt so dass es itz ersch rächt hett kleibt
Doch im ne dritte Alouf han i dänkt da klappt’s de scho | Und han es grosses
Chläbi vo der Chläbirolle gno | Doch das Chläbi isch so läng gsy dass’s hett
abeglampet und | Mit dr Chläbisyte uf mis Gschänkpapier zum lige chunnt
Damit das Missgschick nid no zu wytre Schäde füer | Han i süüferli versuecht
das Chläbi z’löse vom Papier | Doch wüll i nid ha ufpasst wie n i z’andre
Aend ha ghäbt | Hett sich ds länge Chläbi dert mit de churze zwöi verchläbt
Und uf ds Mal hett mi e Wuet packt und wie’s denn halt so isch | Han i mit
dr Fuscht mal chräftig drufghout uf dä Tisch | Doch a der Fuscht isch äbe no
dä Chläbichlumpe gsy | Und’s hett e Rumpf gä id’s Papier und e Riss
querdrübery
Stunde später han i ds Gschänk dert geng no unberüert gseh stah | Und ig ha
mi derfür schlussändlech sälber ypackt gha | Und da ig mi bis hüt nid vo däm
Chläbi ha befreit | Isch di Hochzyt leider schliesslech ou id’s Wasser gheit
Und das Lied han i nid gschribe sondern öpperem diktiert | Wo’s euch
vorsingt damit sich mini Botschaft nid verliert | Chläbi haftet immer
bsunders dert wo dir’s nid weit | Nume nid für öji eigni Unzuelänglechkeit|
Ja Chläbi haftet immer bsunders dert wo dir’s nid weit | Nume nid für öji
eigni Unzuelänglechkeit
Text und Musik: Nils Althaus
© by Nils Althaus