Häb Sorg dass die Träne nid bevor i se ha wägküsst abegheit
I weiss nid öb’s di tröschtet aber mi Urgrossvater dä hett albe gseit
Z’vil Falte heig men ersch we mä sy Buch i Tumbler leit
Und dä Umstand ersch bemerkt wenn es när a ds Glette geit
Doch du schänksch dini Ohre isch das nid irgendwie absurd
Anstatt dim Verehrer nur dim plastische Chirurg
Und dini Bei die syn im ou z’churz und es dörf nid sy dass es Haar z’vil uselampt
So als wärsch du die allereinzig wo sich ab und zue mal uf nes Bruschthaar trampt
Di zerquetschti Nase das mag sy isch keis Gedicht
Doch was jammerisch du hesch doch ou no anders Züg im Gsicht
Und überhoupt was bruuchsch du Schönheit bi dir stimmt schüsch eifach alls
Drum streck dis Houpt geng stolz i d’Höchi das strafft grad outomatisch no di Hals
Jitz hesch es also buechtet ds Kombipack für d’Marilyn Monroe
Das cha doch nid di Ärnscht sy wie söll das ächt ga bi dim Körperbou
I wott doch gar ke Monroe kes Lifting ke dentali Brügg
Alls was i mir wünsche isch mi verstorbnig Cocker-Spaniell zrügg
Und die paar Haartransplantatione die stecksch du doch locker wäg
E chlyni Extension am Steissbei ja und dr Räscht dä geit hützutags zäggzägg
Di natürlech Schönheit unterstriche im nen Ops
Ja was gäb das für ne Spaniell we de dänksch dass jitz scho usgsehsch wie ne Mops
Doch so wien i di kenne mit dire Marilyn Manie
Gönnsch du mir no nid e mal das chlyne Freudeli
Dertdüre bisch du eifach en andre Mönsch als i
Und dänksch obschon die Ablick ja sälber nid muesch usstah nur a di
Text und Musik: Nils Althaus
© by Nils Althaus