Surprise la belle surprise
La dir di Spass nid vermyse
Wirsch gseh dass de d’Spannig dramatisch versterksch
Wenn’d ersch im nachhinein merksch
Dass di Chef in Paris isch we vom Eiffelturm spöisch
Dass er zrügg isch wenn ds Team mit der Story erfröisch
Dass scho d’Ufhängig am Arsch isch wenn dr Chassisbode prüefsch
Dass dr Tonfall bi Chüe zellt wenn dä ruhig Muni rüefsch
Surprise…
Dass si d’Glastüre putzt hei wenn zum Büro us rennsch
Dass di Ex scho isch züglet wenn im d’Wonigstür sprängsch
Dass si d’Landig verchürzt hei we vom Schanzetisch springsch
Dass ihm d’Händschä chly z’gross sy we dr Nachbarsbueb schwingsch
Surprise…
Dass dis Mik louft wenn’d meinsch dass du hütt playback singsch
Und dass‘ nümm louft wenn e lockere Spruch drüber bringsch
Dass stromufwärts ou Strom fliesst wenn a Chuezuun draschiffsch
Dass es geng no nid glehrt hesch wenn e Starchstrommascht triffsch
Surprise la belle surprise
La dir di Spass nid vermyse
Wirsch merke wie’d plötzlech vor Läbensfröid bäbsch
Zmingscht wenn das alls überläbsch
Text und Musik: Nils Althaus
© by Nils Althaus