Wie üeblech Herr Müller nume d’Spitzli
Bim Bart e chly ne scherferi Kontur
Dr Haarasatz uffrüsche und als Abschluss
No nes Bitzeli Volume i d’Frisur
Herr Coiffeur dir chöit ds Tönigsmousse la stecke
Hütt bruch i stattdesse d’Politur
I wott e
2x
Subere Schnitt e subere Schnitt
Ds Rasiermässer füre und abe dermit
D’Klinge schlyfen isch mi einzigi Bitt
I wott e subere Schnnitt
Herr Müller da streckt’s mir ja grad d’Löckli
Darf i frage mit Verloub was isch dr Grund
I han es Gschleik Herr Coiffeur d Frou vom ne Bekannte
Und wäg mir isch si jitz ou no chugelrund
Doch gloubet mir Herr Coiffeur jitz isch fertig
Mim Flohnerläbe schlaat die letschti Stund
I zien e
2x
Subere Schnitt e subere Schnitt
Geschter isch geschter gsy hütt isch hütt
I fa vo null a i waage dä Schritt
I zien e subere Schnitt
Herr Müller i gseh öjes Dilemma
Doch dänket ou a ds Chind und a die Frou
We’s nur eis Chind wär Herr Coiffeur wo vo mir stammt
Doch di andre beide tüe das leider ou
I hätt vor zwöine Jahr nid söllen afa
Was drü Chind i zwöi Jahr momu
Herr Müller das isch e
2x
Subere Schnitt e subere Schnitt
Vo anderthalb Chind pro Jahr wo das git
Da halten nid mal d’Mormone no mit
Das isch e subere Schnitt
Doch wo sich itze uf Herr Müllers Lippe
Es Lächle zeigt wo Gletscher schmelze chönnt
Da fallt am Coiffeur uf dass är das Lächle
Vo sine beide Chind här beschtens kennt
Und verschreckt so heftig dass är mit syr Klinge
Am Herr Müller d’Luftröhre dürtrennt
Und de dänkt är sich zersch scheisse, wie söll itz dä schnufe? Aber när führt är sich no einisch vor Ouge, was ihm dr Herr Müller zwöi mal, nei mittlerwyle drü mal ata hett, drü Ching sire Gattin aghänkt – und de wirft är no einisch e fachmännische Blick uf die Luftröhre und chunnt zum Schluss das isch do eigentlech e
Subere Schnitt e subere Schnitt
Wie dä Luftröhrenufbou a ds Tagesliecht tritt
Ja i hoffe das erfüllt öji Bitt
Nach em ne subere e subere Schnitt e subere Schnitt
Wie dä Luftröhrenufbou a ds Tagesliecht tritt
Ja i hoffe das erfüllt öji Bitt
Nach em ne subere Schnitt
Text und Musik: Nils Althaus
© by Nils Althaus