I ha se troffe won i us dr EPA bi gloffe mit zwöi volle Seck i dr Hand | Si
hett öppe grad ähnlech guet zilet und d’Ychoufsseck si abenand | Dr Gruyère
und d’Schwarzwurzle sy über d’Strass purzlet und als wärs no nid gnue | Di
gringlete Socke won i für Winternächt gkouft ha rolle bis vor iri Schue
I weiss nid öb dir scho mal ds Gfüel heit becho dass euch ds Bluet us de
Adere louft | Und dir Gott dankt heit drfür dass dir keni stabile Papierseck
heit kouft | I ha nüt gwüsst z’säge und si drückt mir als Antwort druuf mini
Socken i’d Händ | Lächlet mi a und i lächle chly zrügg und i gschpüre das
isch mi Momänt
Was für ne Zuefall dass Dir und ig vo allne Rüüm wo läär sötte sy | Beidi
zur glyche Zyt dr glych Rum wei fülle wenn’s Euch passt de lad i Euch y |
Zum ne tête-à-tête uf dä EPA-Cotelêtte so schwungvoll wird’s niene serviert
| Un pas-de-deux über ds Schwynscordonbleue ds Parkett isch salatölpoliert
Äs versteit sich vo sälber dass ig vo all däm nid eis Wort ha gseit | Die
Tröimereie die si mir ersch cho wo sech ds Rot i mim Gsicht scho hett gleit
| Stattdesse han i’re verläge merci gseit und bi Richtig EPA a ire verby |
Und won i mit zwöi nöie Seck wider zrüggchume isch si scho nieneme gsy
I hät ere gärn es Lied vorgspilt se gärn yglade uf nes Glas Wy | Aber i bi
ke James Dean und wie’s usgseht blybt das ir Nächschti derby | I bi o ke
zwöite Georges Brassens i weiss mini Texte sy nid glych brilliant | Aber ire
no mal so nes Lächle z’entlocke daderfür schetz i hätte si glängt
Und vor em Cheminée z’hocke i mine Winternachtssocke das git eim ja scho nes
warms Gfüel | Aber es Füür das wärmt nur vo usse und ds Härz innedrinn lat
es chüel | Und wenn ds letschte Holz verglimmt isch de merk i wi mi
d’Einsamkeit langsam umhüllt | I däm Momänt gäb i viles derfür wär das Stück
lääre Rum näb mir gfüllt
Text und Musik: Nils Althaus
© by Nils Althaus