Dr Herr Gnägi und d Frou Gnägi-Haselstudehain | Die tanze Tango jede Sunntig
im Quartierverein | Und denn wird d’Fonduestube düreglüftet und ds Tangofüür
entfacht | Und mit Inbrunscht im Glychschritt umegstampfet bis dr Bode
kracht
D’Frou Gnägi-Haselstudehain träit am Liebschte gäge links | Doch am Herr
Gnägi vor SVP mä gseht’s im a däm stinkt’s | Är hett d’Träjig gäge rächts
vil besser im Bluet | Doch die tuet äbe am Kreislouf vo sir Frou nid e so
guet
Und so chnorze und heble Gnägis mau chly so | Und de wider mau chli anders
wie’s grad so wott cho | Und dr Herr Gnägi dänkt sich ab und zue so schwär
cha das doch nid sy | Oder ligt es doch nid so am Stil vom Tanz und meh a
syr Anatomie
Zwar lö Gnägis sit em Tango d’Schwyzer-Gricht la sy | Zum Znacht gitz nümme
Omelette und es Glesli Wy | Doch o wenn dr Schwyzerbünzli verjagt isch uf ds
Täller gits geng gnue | S’heisst itz eifach neuerdings Tortillas mit Rioja
derzue
Doch letschte Sunnti hett sich dr Herr Gnägi mit Schwung a Bode gleit | Und
wäg dr Trägheit vo dr Masse es Chnöi derby verheit | Und drum ligt är jitz
uf em Buch und isst d’Tortillas im Bett | Und fluecht vo Zyt zu Zyt i’ds
Chüssi wie gärn är e Bradwurscht wett
Aber so chunnt’s halt we mä jeder Mode nachehetzt | Und darob d’Würkig vo dr
Fliehchraft so masslos unterschätzt | Doch dr Herr Gnägi gseht sicher
d’Ironie nid wo sis Schicksal treit | Und tanzt übernächschte Sunntig wider
Tango wie ne Muni uf dr Weid
Text und Musik: Nils Althaus
© by Nils Althaus