Das Lied won i mir vorgno ha euch z’singe geit um Mönsche so wi dir und ig
Wi sälte dass si Kompromisse finge nöime zwüsche Niderlag und Sieg
Dass si Zyt mit Chriege chöi verbringe doch nachedänke drüber tüe si nid
Nei nachedänke drüber tüe si nid
I weiss es hett scho mänge drüber gsunge und sicher überzügender als ig
Und hett derby de schmärzlech usegfunge: die meischte Mönschen interessiert
das nid
Und dadermit hett ds Lied de nid vil brunge was zellt si ging no Niderlag
und Sieg
Was zellt si ging no Niderlag und Sieg
Scho vili gueti Lieder si erklunge und si dür d’Mönsche wie dür Löchersieb
Und andri schlächti hei d’Lüt meh beschwunge als ds Grüblen über üsi dunkle
Trieb
Hei sen allisamt zum Lache brunge zum Grinse doch zum Nachedänke nid
Zum Grinse doch zum Nachedänke nid
Drum weiss i nid öb i das Lied söll singe wo um Mönsche geit wie dir und ig
Denn z’ghöre dass o wenig viel würd bringe verursacht Schmärze bis i’ds
letschte Glied
Es brächt gloub nid viel euch zum lose z’zwinge vilich isch’s doch besser
sing i’s nid
Es brächt gloub nid viel euch zum lose z’zwinge nei i gloub es isch doch
besser sing i’s nid
Text und Musik: Nils Althaus
© by Nils Althaus