D’Freiheit rüeft mi i cha nid blybe sta
Mini Tribe verkümmere wen i Wurzle schla
Wenn d ga muesch muesch ga
No ne letschti Zigarette ds letschte Glas
Dr Äschebächer lääre dr Ghüder uf d’Strass
Und denn mach i mi usem Stoub
I ha gwüsst irgendeinisch lan i alles la stah
Und itz mues i nume no d’Chatz usela
Wenn d ga muesch muesch ga
Und wenn i scho dran bi no gad d’Wösch inenäh
D’Duurufträg stoppen und d’Büecher zrüggäh
Und denn mach i mi usem Stoub
Guet bevor i dä Ort hie für immer verla
Villech ds Gfrierfach abtoue und ds Schmelzwasser uffa
Wenn d ga söttsch söttsch ga
Ou bevor i’s vergisse sött no ds Bett nöi bezieh
D’Neujahrswünsch verdanke schüsch mach i das nie
D’Nachbaren ylade das schuld i ne scho lang
Aber für das mues i zersch suge und neu strychen im Gang
Und doben im Estrich isch immer no das huere Puff
Und we’s mir rächt isch han i gloub immer no mini Winterpneu druff
Und d’Brombeeri die wuchere we me da nüt macht
Und äbe d’Veranda wär scho schön überdacht
Und we men itz im grosse Schlafzimmer es Wändli würd inezieh de chönnt men us dr linke Helfti äben es Arbeitszimmer mache und es dr rächte… das mues i itz schnäll go usmässe
Text und Musik: Nils Althaus
© by Nils Althaus