Mä verzellt sich mä heig mi vom Zwüschedeck här ghöre schreie
Won i mi anstatt a d’Mueterbruscht a nes Bordgschütz heig gschmiegt
Und dä Schrei heig nid ufghört bis mi füf Tag später potzheie
Dr Sturm vom Jahrhundert i friedleche Schlummer heig gwiegt
Und sit denn sy die Planke mi Heimat gsy und dr Totechopf mi Schutzpatron
Dr Tod mi Begleiter und ds Rumfass mi Brut und d’Gischt uf de Lippe mi Lohn
Und so stich i mit mir Schar Getreue zum letschte Mal lachend i See
Zum ne jahahaha zum ne johohoho zum ne schwarzpulvertränkten Ade
Mit dene zäh Gebot hei mir’s nie ganz so äng gno
Alli Gsetz wo mir bruucht hei die hei mir geng sälber erla
Mir hei plünderet und hei usgroubt was üs isch i d’Händ cho
Nume Gäld und persönlechi Gägestand hei mer ne gla
Und bim Morde hei mir keis Erbarme kennt ussert bi Frouen und Chind
Und Väteren und Söhn und Grossöhn und Unklen und Tier bsunders Chatzen und Hünd
Und Gfangeni hei mir ersch rächt nie gmacht öb altersschwach oder verletzt
Nei die jahahaha ja di johohoho hei mir vor ihrer Hustür abgsetzt.
Üsi Gschütz hei ging blitzet und knallt aber niemals scharf gschosse
Und zur Sicherheit hei mir no zilet a allem verby
Und am Abe hei mir jedi glimpflechi Seeschlacht begosse
Aber ging nur so viel dass o d’Fahrtüchtigkeit gwährt isch gsy
Und wenn d’Nacht isch cho sy mir dür d’Dörfer jedem zitternde Rock hinterhär
Und mir hei se no jedesmal schnäll überzügt dass e warmen Empfang abracht wär
Und zwar mit Geduld und Verständnis und geischtryche Redekünscht
Aber nur ahaha aber nur ohoho wenn sie’s sälber usdrücklech hei gwünscht
Ja so hei mir üs amüsiert vo Sursee bis Sempach
Vo Nottwil bis Eich und em ganze Sämpachersee
Doch die Planke sy morsch mir Fregatte wird morn es Änd gmacht
Denn e wyteri Bootsprüefig schafft dä Kahn nümme meh
Und bi schlächt gwartetem Eicheholz da isch ds Unfallrisiko z’gross
Drum wirfen i mi hütt es allerletschts Mal dere tosende Furien i Schoss
Ig dr letscht vo minere Sorte wo sis sinkende Schiff no verlat
Ig dr jahahaha ig dr johohoho ig dr letscht Süesswasserpirat
Text und Musik: Nils Althaus
© by Nils Althaus